Bizning asosiy maqsadimiz — og‘ir toifadagi mahallalarda istiqomat qiluvchi, hayotini ijobiy tomonga o‘zgartirishga tayyor bo‘lgan fuqarolarni aniqlash va ularni kasbiy ko‘nikmalar, biznes-reja tuzish, tadbirkorlik yuritish hamda kooperativ boshqaruvi asoslariga o‘rgatish orqali barqaror daromad manbaiga ega qilishdir. Loyiha doirasida ishtirokchilarga o‘z “driver” loyihalarini yo‘lga qo‘yish uchun moddiy, texnik, huquqiy va tashkiliy ko‘mak ko‘rsatiladi. Bu orqali yangi ish o‘rinlari yaratiladi, aholi bandligi ta’minlanadi, pirovardida esa kambag‘allikni qisqartirish va hududlarda farovonlik darajasini oshirishga xizmat qiluvchi samarali mexanizm shakllantiriladi. O‘z biznesini yo‘lga qo‘ygan ishtirokchilarni kooperativga birlashtirish orqali qo‘shilgan qiymat zanjiri yaratiladi. Natijada mahalliy aholi, xususan yoshlar va ayollar uzviy bog‘langan kasbiy ta’lim, ish bilan ta’minlash va tadbirkorlik imkoniyatlari bilan qamrab olinadi. Bu esa moliyaviy mustaqil, o‘zini-o‘zi boshqaruvchi “kooperativ” biznes modelini shakllantirishga zamin yaratadi.